சோத்துக்கடை - வளர்மதி மெஸ், ரேஸ்கோர்ஸ், கோவை

தேடி தேடி உண்ணும் உணவகத்தில் இந்த கடையும் ஒன்று. நண்பர் ஒரு வர் இங்க போய் சாப்பிடுங்க நிச்சயம் பிடிக்கும் என்றார். சரி என்று சனிக்கிழமை இரவு சாப்பிட சென்றேன். ரேஸ்கோர்ஸ் காஸ்மாபாலிடன் க்ளபை ஒட்டு உள்ள சாலையில் சென்றபோது இடது பக்கம் வளர்மதி மெஸ், கொங்கு நாட்டு சமையல் முறைப்படி என்று எழுதி இருந்தது. காரை கடையின் எதிரில் பார்க் செய்து விட்டு குடும்பத்தோடு உள்ளே சென்றேன். ஒரு 30 பேர் அமர்ந்து சாப்பிடும் வகையில் ஏர்கண்டிசனோடு அமைந்திருந்தது இந்த உணவகம்.

சாப்பிட உட்கார்ந்ததும் மெனு கார்டு கொடுங்க என்றேன், மெனு கார்டு இல்ல சார் எங்க ஸ்பெசல் என்று பிரியாணி, புரோட்டா, முட்டை புரோட்டா, சிக்கன் கறி தோசை, மட்டன் கறி தோசை, பிச்சு போட்ட சிக்கன் பெப்பர் வறுவல், மீன், நெத்திலி மீன் என்று வரிசையாக சொன்னார்.

நான் புரோட்டா, சிக்கன் கறி தோசை, பிச்சு போட்ட சிக்கன் வறுவல், நெத்திலி மீன், ஒரு ரோஸ்ட் என்று ஆர்டர் செய்து காத்திருந்தோன். இரண்டு சின்ன ஜக்கில் சிக்கன் குழம்பு, மட்டன் குழம்பு என்று வைத்தனர். தலைவாழை இலை போட்டு, தண்ணீர் தெளித்து காத்திருந்தேன் சாப்பிடுவதற்கு.

ஆர்டர் சொன்னவைகள் வர சிறிது நேரம் ஆகும் என்பதால் சிக்கன் குழம்பை கொஞ்சம் ஊற்றி, தொட்டு நக்கி பார்த்தேன். மசாலா கையில் அரைச்சிருப்பாங்க போல குழம்பு அதிகம் காரம் இல்லாமல், சரியான விகிதத்தில் உப்பு கலந்து, மசாலா மனம் இல்லாமல் குழம்பு மனத்தில் இருந்தது. ஊர்ப்பக்கத்தில் கையில் அரைச்சி குழம்பி வைக்கும் போது தான் இந்த பக்குவம் வரும், ஆஹா ஒரு கரண்டி குழம்பு உள்ளே போய்விட்டது.

மட்டன் குழம்பும் இது போலவே இருந்தது. உள்ளே ஒரு பீஸ் இருந்ததால் அதையும் சாப்பிட்டு பார்த்தேன், மசாலாவோடு நன்கு வெந்திருந்தது. மசாலாவும் கறியும் நல்ல சுவையில் இருந்தது.

சிக்கன் கறி தோசையும், பிச்சுப்போட்ட சிக்கன் வறுவலும் வந்தது. தோசையின் மேல் முட்டை மற்றும் வெங்காயம், சிறு பச்சை மிளகாய், கொத்தமல்லி தலையோடு சிக்கன் பீசை போட்டு நன்றாக முன்னும் பின்னும் சரியான பக்குவத்தில் சுட்டு கொடுத்திருந்தனர். கொஞ்சம் கூட தீயாமல் இருந்தது. அந்த தோசையை பிச்சு சிக்கன் கிரேவியில் தடவி அப்படியோ நாவில் கொண்டு போய் தோசையை வைக்கும் போது தான் தெரிந்தது அதன் உச்சபட்ச சுவை. நன்றாக ரசிச்சு ரசிச்சு சாப்பிட்டதில் 2 நிமிடத்தில் காணமல் சென்று விட்டது சிக்கன் கறி தோசை.

அடுத்து பிச்சு போட்ட சிக்கன் பிரை இதில் நன்கு வேகவைக்கப்பட்ட சிக்கனில் வெங்காயம், பச்சை மிளாகய், கறிவேப்பில்லை கூடவே பெப்பரும் போட்டு நன்றாக பிரட்டி கொடுத்திருந்தனர். தோசையின் நடுவே இந்த சிக்கனை வைத்து அப்படியே குழம்பில் துவட்டி துவட்டி சாப்பிடுவதில் தான் எவ்வளவு சுவை. இதற்காகவே மீண்டும் அங்கே போகனும் போல இருக்குங்க..

நெத்திலி மீன் வறுவல் கொடுத்தனர், மீனை முதலில் சாப்பிட்ட என் மனைவி மீன் வாசமே இல்லை நன்றாக ப்ரை செய்து இருக்காங்க, காரமும் குறைவு என்றதும் மகனுக்கும் கொடுத்தேன் அவனும் சாப்பிட்டு எனக்கு இன்னொன்று என்றான். அடுத்த நான் நெத்திலியை எடுத்து கடிக்கும் போது தான் தெரிந்தது அது புது நெத்திலிமீன் என்றும், மீன் வாடை துளியும் இல்லாமல் சுவையாக சமைத்திருந்தது பிடிச்சிருந்தது.

புரோட்டாவும் நன்றாகவே இருந்தது. மொத்தத்தில் மனசு நிறைய கொங்கு சமையலை சாப்பிட வளர்மதி மெஸ்க்கு போகலாம். மதிய உணவு இன்னும் சாப்பிட்டு பார்க்கவில்லை விரைவி போய் சாப்பிடனும். விலை மற்ற ஏசி உணவகங்களின் விலை போலத்தான் சுவைக்காக தைரியமாக கொடுக்கலாம். நாங்க 3 பேர் சாப்பிட்டதற்கு 425 ரூபாய் ஆச்சு இரவு உணவிற்கு...

அமைவிடம்: ரேஸ்கோர்ஸ் காஸ்மா பாலிடன் க்ளப் பக்கத்து ரோடு மற்றும் போட்டோ சென்டருக்கும் எதிர்ரோட்டில் அமைந்துள்ளது.

சோத்துக்கடை - அவிநாசி ரோடு வடக்கடை

சோத்துக்கடை பகுதியில் வடக்கடை எழுதலாமா? வேண்டாமா? என்று நெடுநாளாக யோசித்து, கடைசியாக இதிலே எழுதிவிடவேண்டும் எனவும், உணவகங்களை பற்றி எழுதும் அனைத்து கட்டுரைகளையும் இனி சோத்துக்கடையில் எழுதுவது என்று முடிவெடுத்துவிட்டேன், நிறைய டீக்கடைகளைப்பற்றியும் விரைவில் எழுதனும்.

அவிநாசி ரோடு வடக்கடை

இந்த வடக்கடைக்கு நாங்கள் வைத்த பெயர் தான் அவிநாசி ரோடு வடக்கடை, கடையின் முதலாளி இந்தக்கடைக்கு பேரே வைக்கவில்லை என்பது தான் இந்த கடையின் ஸ்பெசல்.

எனது அலுவலகத்தின் மிக அருகில் இந்தக்கடை உள்ளது. ஒரு 3 வருடங்களுக்கு முன் மாலை நேர பசி காரணமாக லஷ்மி மில்ஸ் ஜங்சனில் அதிக கடைகள் இல்லை, எங்க போய் என்ன சாப்பிடலாம் என்று யோசிச்சு திரும்பும் போது ஏர்டெல் ஆபிசின் நேர் எதிர்புறம், அம்மன் குளம் போகும் வழிக்கு பக்கத்தில் இடதுபுறம் கூட்டமாக நின்று கொண்டு கையில் தட்டை ஏந்தி சாப்பிட்டுக்கொண்டு இருந்தனர், சரி நாமும் போய் பார்ப்போமே என்று ஒரு தட்டை வாங்கி 2 மெது வடைகள் வாங்கினேன், சாப்ட் என்றால் சாப்ட் அப்படி ஒரு மெதுமெதுப்பு, லபக் லபக் என்று உள்ளே போனதே தெரியாமல் போனது. காரம் அதிகம் இல்லாமலும், உப்பு அதிகம் இல்லாமலும் அவர்கள் கொடுத்த தேங்காய் சட்டினியோடு வழுக்கி விழந்தது நாவில் அப்புறம் என்ன மெது வடை மட்டும் 6 உள்ள போய்டுச்சு, கூட்டம் அதிகமானதால் அடுத்த முறை வந்து மற்ற வடைகளை சாப்பிடவேண்டும் என்று கிளம்பிவிட்டேன்..

மீண்டும் நான்கு நாட்கள் கழிச்சு ஒரு வெள்ளிக்கிழமை அன்று மதியம் சப்பாத்தி சாப்பிட்டதால் 4 மணிக்கு பசி மீண்டும் வயிற்றை எட்டிப்பார்த்து கிள்ளியது, ஓவராக கிள்ளியதால், யாரையும் துணைக்கு அழைக்காமல் வடக்கடை முன் நின்றேன். கூட்டமும் குறைவாக இருந்ததால் முதலில் கட்லெட் சொன்னேன், கட்லெட் சைஸ் சின்னதாகத்தான் இருந்தது ஆனால் சுவை செம்ம.. அடுத்து வெஜ்ரோல் இவர்கள் கொஞ்சம் வித்தியாசமாக செய்து கொடுத்தனர் ஒரு உருண்டையில் எல்லா காய்கறிகளையும் வேக வைத்து அதை அந்த உருண்டையில் வைத்து, எண்ணெய்யில் பொறிச்சு எடுத்து தருகின்றனர், சுடச்சுட வெஜ் ரோல் சாப்பிடும் போது அற்புதமான சுவையால், 1 எல்லாம் பத்த மாட்டிங்குது, குறைந்தது 4 சாப்பிட்டால் தான் "நா" அடங்குகிறது.

அடுத்து பன்னீர் போண்டா, இது பெரும் ஓட்டலில்தான் அதிகம் கிடைக்கின்றது, இதைப்போல சின்ன கடைகளில் இப்போது தான் சாப்பிட்டேன், இதன் சுவையும் செம்ம.. என்ன கடந்த 2 முறையாக சென்ற போது பன்னீர் போண்டா அதிகம் போடுவதில்லை என்று என் "நாக்கை" காய வைத்து விட்டனர்.

சமோசா வழக்கான சுவையில்லாமல் வீட்டில் செய்வது போன்ற சுவை, வாழக்காய் பஜ்ஜி, பருப்பு வடை என ஒரு 7 விதமான வடைகள் போட்டு கொடுக்கின்றனர், குறைஞ்ச பட்சம் 7 வகைகளையும் சாப்பிடும்போது தான் சாப்பிட்ட திருப்தி ஏற்படுகின்றது.

இந்த கடையின் சுவைக்கு காரணம் என்ன வென்று பார்த்தால் இவர்கள் தரமான பொருட்களை உபயோகிப்பதோடு, எண்ணெய் அடிக்கடி மாற்றுகின்றனர், 3 முறைக்கு மேல் எண்ணெய்யை உபயோகிப்பதில்லை என்பதால் சுவை கூடுகிறது. கோவை பக்கம் வருபவர்கள் மாலை வேலையில் பஜ்ஜி, போண்டா சாப்பிட இந்த கடைக்கு நிச்சயம் வரலாம்..

பெயர்: அவிநாசி ரோடு வடக்கடை

இடம்: லஷ்மி மில்ஸ் சந்திப்பில் இருந்து அவிநாசி செல்லும் வழியில் ஏர்டெல் ஆபிசிக்கு எதிரே, கேஆர்எஸ் பேக்கரியின் பக்கத்துல் இருக்கிறது ( மதியம் 12 மணியில் இருந்து ஒருவர் வடை போட்டுக்கொண்டே இருப்பார், 4 பேர் நின்று சாப்பிட்டுக்கொண்டே இருப்பர்)

விலை: எந்த வடை எடுத்தாலும் 7 ரூபாய் மட்டுமே...

சோத்துக்கடை - கிருஷ்ணபவன், சித்தாபுதூர், கோவை

கோவையில் உள்ள சிறந்த சைவ உணவகத்தில் இதுவும் ஒன்று, என்று நிச்சயம் சொல்லலாம், விலையோ மற்ற சைவ உணவகத்தை விட மிக மிக குறைவு என்று தைரியமாக சொல்லக்கூடிய உணவகம். சைவ உணவகத்திற்கு கோவையில் நிறைய உணவகங்கள் உள்ளன, அதுவும் பல இடங்களில் கிளைகளைக் கொண்ட பிரபல உணவகங்கள் நிறைய இருக்கின்றன. அவை அனைத்திற்கும் ஈடாக இங்கு கூட்டம் நிறைந்து இருக்கும் என்பது கண்கூட கண்டது.

இந்த கிருஷ்ணபவன் உணவகத்திற்கு 8 வருடமாக நான் வாடிக்கையாளர், திருமணம் முடிந்து கோவைக்கு தனிக்குடித்தனம் வந்த உடன் என் மனைவிக்கு முதன் முதலாக நான் அறிமுகப்படுத்தியது இந்த உணவகம் தான், வீட்டில் சோறு ஆக்கவில்லையா, இருக்கவே இருக்கு கிருஷ்ணபவன் என்று எங்களோடு கலந்த உணவகம்.

வெளியே சிறிய கடை மாதிரிதான் இருக்கும், உணவகத்தின் உள்ளே சென்றால் இரண்டு பாகங்களாக பிரிக்கப்பட்டு 60 பேருக்கு மேல் அமரக்கூடிய அளவில் இருக்கும் உணவகம், ஒரு மேற்பார்வையாளர் அனைவரும் உட்கார இடவசதி செய்து கொடுப்பார், இடம் இல்லாதவர்களை அமர வைத்து முன் வந்தவர்களுக்கு இடம் ஏற்பாடு செய்து தருவார். இந்த கவனிப்பிலேயே நம்மை முதலில் மனநிறைவாக்கி விடுவர்.

இந்த உணவகத்தில் தட்டுக்களைத்தான் பயன்படுத்துகின்றனர் தட்டுக்கள், கழுவி அதன் பின் சூடாக்கப்பட்டு பின்பு தான் பரிமாற டேபிளுக்கு கொண்டு வருகின்றனர், மிக சுத்தமான முறையில் இருக்கும் டேபிளும், தட்டும் அடுத்து பரிமாறுபவர்கள் அனைவரும் கையில் உறை உடன் தான் காணப்படுவர், மிக சுத்தமாகவும், சுகாதாரமாகவும் இருக்கும் இந்த உணவு விடுதி.

சரி உணவுக்கு வருவோம். நான் குடும்பத்தோடு எப்போதும் இங்கு வந்தாலும் முதலில் ஆர்டர் செய்வது மினி இட்லி, காரக் கொழுக்கட்டை, இனிப்பு கொழுக்கட்டை, இடியாப்பம், பணியாரம், பூரி, சேவை, சில்லி கோபி, ரவா ரோஸ்ட் கடைசியாக கம்மங்கூழ். இது தான் எங்கள் ரெகுலர் மெனு, கூட வந்திருக்கும் நண்பர்களைப் பொறுத்து மாறும் மற்ற வகைகள். ஆர்டர் செய்த பின் அதிக நேரம் காத்திருக்கவேண்டியதில்லை 5 நிமிடத்தில் டேபிளுக்கு மினி இட்லி வந்து விடும்.

மினி இட்லி ஒரு குழியான தட்டில் சாம்பாரோடு மிதந்து வரும் உடன் கொஞ்சம் நெய்யும், கொஞ்சம் வெங்காயமும் இருக்கும். தேங்காய் சட்னி, தக்காளி காரச்சட்னி, பொதினா சட்னி, கத்திரிக்காய் சட்னி என்று நான்கு வகையான சட்டனிக்கள் எப்போதும் டேபிளில் இருக்கும், தேங்காய் சட்னி கொஞ்சம் எடுத்து மினி இட்லி, சாம்பார், நெய், வெங்காயம் கலந்து ஒரு துளி நாவில் வைக்கும் போது நல்ல சுவையும் இருக்கும், மீண்டும் அடுத்த எப்ப நாவில் இட்லியை வைப்பார்கள் என்று நா ஏங்கும் அளவில் இருக்கும் சுவை. இரண்டு நிமிடத்தில் மினி இட்லி சாம்பார், சட்னி எல்லாம் கலந்து உள்ளே சென்று விடும். அந்த சுவையை மறக்க கொழுக்கட்டை சாப்பிட்டு நாவை அடுத்த சுவைக்கு தயாராக வைக்கவேண்டும்.

கொழுக்கட்டை காரம், இனிப்பு என இரண்டு வகையில் கிடைக்கும் நல்ல தரமாகவும், சுவையாகவும் இருக்கும். அடுத்து இடியாப்பம் வந்தது கூடவே தேங்காய்ப்பால், காரக்கடலை குழும்பு, தக்காளி சாஸ் உடன் வந்தது. வந்த சுவடே தெரியாமல் கரைத்தது என் நாக்கு. அடுத்து வந்த ரவா ரோஸ்ட்க்கு அவர்கள் கொடுக்கு நான்கு வகையான சட்டினி மற்றும் சுவையான சாம்பாருக்கு ஈடு கொடுக்க முடியாமல் தடுமாறும் நம் நாக்கு. இங்கு தினமும் ஒரு வகையான சேவை உண்டு, நான் சாப்பிட்டது லெமன் சேவை அதிக புளிப்பும் இல்லாமல், காரமும் இல்லாமல் லெமன் சுவையுடன், சாம்பரும் சேர்ந்ததால் சுவையில் சொக்கிப்போனது என் நாக்கு. 

கோபி சில்லி மற்ற இடங்களில் சாப்பிடுவதை போல இருக்காது, அதன் சுவையும் நன்கு இருக்கும், இது இல்லாமல் கோதுமை தோசை, ராகி, கம்பு, சோளம் என வித விதமான தோசைகள், அடை அவியல் என் ஒவ்வொன்றும் கிராமத்து வீட்டுச்சுவையுடனே இருப்பதால் இந்த உணவகம் ஒரு ஸ்பெசல் உணவகமாக வெற்றி பெற்றுள்ளது. இந்த உணவகத்தில் எதை சாப்பிடாமல் விட்டாலும் கம்மங்கூழ் மட்டும் சாப்பிடாமல் வரக்கூடாது அம்புட்டு சுவை. கம்மங்கூழுடன் கொஞ்சம் வெங்காயம், ஒரு மோர் மிளகாய், ஒரு வடு மாங்காய் என நம்மை திணடிக்கின்றனர் அவர்களது சுவையான உணவுகளால்.

கோவை வந்தால் இரவு சாப்பிடுவதற்கு நல்ல சைவ உணவகம் வேண்டும் என்றால் தைரியமாக செல்லலாம் கிருஷ்ண பவனுக்கு. இங்கு நீங்கள் செல்லும் போது கடையின் வெளியில் நிற்கும் கார்களைப்பார்க்கும் போதே தெரியும் இந்த கடையின் வாடிக்கையார்களைப்பற்றி. அடுத்து மாலை நேர உணவகம் என்பதால் 7 மணி முதல் 11 மணி வரை செயல்படுகிறது. 8 மணிக்கு பின் எப்போது போனாலும் க்யூவில் நின்று தான் சாப்பிடவேண்டும். அம்புட்டு கூட்டம் இருக்கும், அங்கு இருக்கும் கூட்டத்தை பார்க்கும் போது தான் தெரியும் யார் வீட்டிலும் சோறு ஆக்குவதில்லை என்று.

பெயர்: ஸ்ரீ கிருஷ்ணா டிபன் ரூம்

இடம்: மகளில் பாலிடெக்னிக்கில் இருந்து இராமகிருஷ்ணா மருத்துவமனை செல்லும் வழியில் பெருமாள் கோயில் முன்புறம்.

விலை: மற்ற உயர்தர சைவ உணவகத்தை விட மிக குறைவுதான். அனைத்து தரப்பு மக்களும் சாப்பிடும் விலை தான்...

சோத்துக்கடை - டோபாஸ் ஐயர் மெஸ், பேரூர், கோவை..

கோவையில் உள்ள பழமையான ஊர்களில் ஒன்று பேரூர். கோவையைச்சுற்றிப் பார்ப்பவர்கள் பட்டியலில் நிச்சயம் பேரூர் இருக்கும். இந்த ஊரின் எல்லையிலேயே புரதான நகரம் தங்களை அன்புடன் வரவேற்கிறது என்ற பெயர் பலகையோடு தான் ஆரம்பிக்கிறது. பேரூர் பட்டீஸ்வரர் ஆலயம் 1500 ஆண்டுகளுக்கு முன் கட்டப்பட்ட சிவன் ஆலயம். பேரூர் சாந்திலிங்க அடிகளாரின் மடமும், தமிழ்கல்லூரியும் இங்கு அமைந்துள்ளது இந்த ஊரின் சிறப்பு.

சுற்றுலாத்தளம் அருகில் நல்ல உணவு விடுதி கிடைப்பது அரிது என்பதும் பேரூர்க்கும் பொறுந்தும். நிச்சயம் காலை வேலை தரிசனத்துக்கு வருபவர்கள் நல்ல உணவகம் இல்லை என்று வருத்தப்படுவர். ஆனால் மாலை வேளையில் அந்த பிரச்சனை இல்லை, கோயிலின் பின்பக்கம், சிறுவாணி சாலையில் அமைந்துள்ளது டோபாஸ் ஐயர் மெஸ். கிட்டத்தட்ட 15 ஆண்டுகளுக்கு மேலாக இந்த கடை இயங்குகிறது.

மாலை 4 மணியில் இருந்து கடை இயங்க ஆரம்பிக்கிறது, கோவையில் கும்பகோணம் டிகிரி காபி ஒரிஜினலாக குடிக்க விரும்புவர்கள் நிச்சயம் இங்கு வந்து குடிக்கலாம், அந்த அளவிற்கு சுவையான காபி இங்கு கிடைக்கும். மிக்சர், முறுக்கு போன்ற பலகாரங்களும் ஐயர் வீட்டு முறைப்படியும், அவர்களின் வீட்டு சுவையிலும் இருக்கும். 7 மணிக்கு மேல் சென்றால் முறுக்கு, மிச்சர் கிடைக்காது. அந்த அளவிற்கு பிரபலம்.

மாலை 6 மணிக்கு மேல்தான் ஆரம்பிக்கிறது சிற்றுண்டி, இங்கு சாப்பிட 7 பேர் அமர்ந்து சாப்பிடும் படியான இடம் மட்டுமே அமைந்திருக்கும், பார்சல் கட்டுவதற்கு மட்டும் 3 பேர் இருக்கின்றனர். இங்கு வந்து ஆர்டர் செய்பவர்கள் மாமி எனக்கு 4 இட்லி, 2 புரோட்டா என்று ஆர்டர் சொல்லிக்கொண்டே இருப்பர். மாமியும் பொறுமையாக அனைவருக்கும், பொட்டலம் கட்டிக்கொடுத்துக் கொண்டு இருப்பார். 9 மணிக்கு மேல் சென்றால் தோசை மட்டுமே கிடைக்கும்.

மாலை வேளைகளில் இட்லி, சேவை, பிரியாணி, உப்புமா, புரோட்டா, தோசை, ஊத்தாப்பம், ஆனியன் ரோஸ்ட், மசால் ரோஸ்ட், நெய் ரோஸ்ட், ராவா தோசை என ஆர்டர்கள் பறக்கும். இங்கு கொடுக்கப்படும் சாம்பாரின் சுவையே சுவைதான். தேங்காய் சட்டினி, காரச்சட்டினி, வெஜ் குருமா என அனைத்தும் வீட்டில் சாப்பிடுவது போலவே சுவையாக இருக்கும்.

நான் கடந்த 4 வருடமாக இந்த கடைக்கு வாடிக்கையார், அதாவது இந்த ஏரியா குடி வந்ததில் இருந்து வாரம் இரு முறை இங்கு பார்சல் வாங்கிடுவேன். இட்லிக்கும் இந்த ஐயர் மெஸ் சாம்பாருக்கும் அப்படியொரு சுவை. நான் இட்லியை இந்த சாம்பாரில் மூழ்கடிச்சு கரைத்து சுவைப்பேன் அப்படி ஒரு சுவை இந்த சாம்பார். எப்பவும் பார்சல் வாங்கிவிட்டு சாம்பார் பாக்கெட் எக்ஸ்ட்ராவாக கேட்டு வாங்காமல் வருவதில்லை இன்று வரை.

ஒரு நாள் வீட்டில் எல்லாரும் ஊருக்கு சென்றாதால் அங்கு சாப்பிடச் சென்றேன். இன்று ஆணியன் ரோஸ்ட் ஸ்பெசல் என்றனர், சரி என்று ஒரு ரோஸ்ட்டை ஆர்டர் செய்தேன், கையில் தட்டோடு சாம்பாரை வலிச்சு நக்கிக்கொண்டே காத்திருந்தேன். முக்கோண வடிவில் வந்த ஆணியன் ரோஸ்ட்டை பிச்சு அவர்கள் கடை சாம்பாரில் முக்கி வாயில் துணித்தேன் அவ்வ்வ்... அப்படியே வழுக்கியது தோசை. அளவான உப்பில், புளிக்காத மாவில் நன்கு எண்ணெய் ஊற்றப்பட்ட ஆணியன் தோசை என்னோடு சண்டையிடாமல் வேகமாக உள் இறங்கியது. ஆணியன், கேரட் துறுவல், முந்திரி, திராட்சை போட்டு சுட்டு இருந்தனர். அன்றில் இருந்து இன்று வரை அந்த கடை ஆணியன் ரோஸ்ட்டுக்கு அடிமை நான்.

நெய் ரோஸ்ட், ரவா ரோஸ்ட் அவ்வப்போது சாப்பிடுவேன், புரோட்டாவும் குருமாவும் என் மகனின் பேவரைட். இங்கு பார்சலுக்கு வரும் கூட்டத்தை பார்த்தாலே புரியும் இந்த கடையின் சுவைபற்றி. இந்த ஐயர் மெஸ்  சுகாதாரமாகவும் இருக்கும்.

இந்த மெஸ்சில் விலைப்பட்டியல் நிச்சயம் அதிகமாக இல்லை. வயிறு நிறைய சாப்பிட்டாலும் 60 ரூபாயை தாண்டாது அந்த அளவிற்கு குறைவான விலை, தரமான உணவு நிச்சயம் நம்பி சாப்பிடலாம். எங்கு சாப்பிட்டாலும் அடுத்த நாள் காலை பிரச்னை இன்றி இருக்கவேண்டும் என்பதில் அனைவரும் கவனமாக இருப்போம். நம்பி சாப்பிடலாம் வயிற்றை எந்த பதமும் பார்க்காது என்பது உறுதி.

பெயர்: டோபாஸ் ஐயர் டிபன் சென்டர்

இடம்: பேரூரில் இருந்து சிறுவாணி செல்லும் வழியில் வலது பக்கம்.

விலை: 2 இட்லி 10, ஆணியன் ரோஸ்ட் 30, புரோட்டா 10

சோத்துக்கடை - ஹோட்டல் அன்னலட்சுமி, சத்தியமங்கலம்

ஒரு வருடத்திற்கு முன் சத்தியமங்கலம் வழியாகத்தான் ஒவ்வொரு வாரமும் அந்தியூர், பவானி செல்வேன். இப்போது தேசிய நெடுஞ்சாலை ஒரளவிற்கு சரி செய்ததால் தேசிய செடுஞ்சாலையிலேயே பயணிக்கிறேன். சத்தி வழியாக சென்றாலும் அதிகம் சாப்பிடுவதில்லை வழியில் கிடைக்கும் நொங்கு, பதனீர், கொய்யா என வழியில், சாலையில் விற்கும் பழங்கள் எல்லாம் வாங்கி சாப்பிடுவதுதான் வாகனத்தில் செல்லும் போது உற்சாகமாக இருக்கும்.

ஆசனூர் செல்வதற்காக சத்தியில் கறி வெட்டிக்கொண்டு இருந்தோம், கறிக்கடைக்காரரிடம் இங்கு காலை உணவிற்கு இட்லியும், குடல்கறியும் எங்கே கிடைக்கும் என்று விசாரித்தோம் அவர் அப்படி எல்லாம் இங்கு கிடைக்காதுங்க என்றார், சரி தேடுவோம் என்று ஒவ்வொரு இடமாக விசாரிக்க ஆரம்பித்தோம்.

காலை உணவுகள் அதிகம் இட்லியாகத்தான் இருக்கும் அநேக வீட்டில், ஞாயிறு அன்று மட்டும் அசைவம் வைத்து சாப்பிடுபவர்கள் சிக்கன் அல்லது கறிக்குழம்போடு சாப்பிடுவர், இட்லிக்கு எத்தனையோ குழம்புகள் சுவையாக இருக்கும் என்று சொன்னாலும் இட்லியும், குடல்கறியையும் அடிச்சக்கவே முடியாது, குடல் கறி பிரியர்கள் அநேகம் பேர் இந்த வரியை நிச்சயம் வழி மொழிவார்கள். அதுவும் குடல் பொறியலை விட குடல் குழம்புக்குத்தான் இட்லியுடன் கலந்தடிக்கும் போது சுவை கூடும். இதற்காகவே வெளியூர் சென்றால் இட்லி குடல்கறி எங்கே கிடைக்கும் என்று ஒரு சுத்து சுத்தி வருவேன் அந்த ஊரை.

நிறைய பேருக்கு அவர்கள் ஊரில் ஹோட்டல் இருக்கிறது என்று தெரியும் ஆனால் அங்கு என்ன நன்றாக இருக்கும் என்றும் அதற்காக நிறைய பேர் அங்கே சாப்பிட வருகிறார்கள் என்று தெரியாது. ஊரின் அருமை ஊர்க்காரர்களுக்கே தெரியாது என்று கூட கூறலாம். இந்த ஹோட்டல் படத்திற்காக நண்பர்களை தொடர்பு கொண்ட போது அப்படியா, அங்க இது பேமஸா என்ற எதிர் கேள்வி கேட்கின்றனர்.

சத்தியமங்கலத்தில் ஒரு ஆட்டோ டிரைவரிடம் விசாரிக்கும் போது அன்னலட்சுமிக்கு போங்க இதே ரோட்டில் என்றார். அன்னலட்சுமி ஹோட்டல் வாசல் வந்தததும் பெரிய கடை, முன்னாடி விசாலமான வாகனம் நிறுத்தும் இடம், ப்ளக்ஸ் போர்டில் அன்னலட்சுமி சைவம், அசைவம் என எழுதி இருந்தது, கடையின் உள்ளே சென்றதும் குடல் ரெடியா என கேட்டேன், அண்ணே குடல் ரெடியாக இன்னும் 5 நிமிடம் ஆகும் ஆனா, தலைக்கறி ரெடி என்றனர். என் கூட வந்த உடன்பிறப்புக்கள் அப்படியா தலைக்கறி என்றால் ஒகே என்று உள்ளே வந்தால் உட்கார இடம் இல்லை. பேருந்து நிலையம் பக்கத்தில் இருப்பதால் போக்குவரத்து ஊழியர்கள் தான் அநேகம் பேர் சாப்பிட்டுக்கொண்டு இருந்தனர் அவர்களின் தினசரி காலை உணவு அங்கேதானாம்.

சிறிது நேரத்தில் இடம் கிடைத்தது வரிசையாக உட்கார்ந்து கொண்டு இட்லி தலைக்கறி ஆர்டர் செய்தோம். ஆளுக்கு இரண்டு இட்லி கூடவே ஒரு சிறிய தட்டு நிறைய க்ரேவியுடன் தலைக்கறி. இட்லியை பிச்சு கிரேவியுடன் தொட்டு நாவில் வைத்தவுடன் அளவான காரத்தில் இருந்தது கிரேவி அப்படியே நாவில் கரைந்தது. எதிர்பார்க்கவில்லை நான் அவ்வளவு சுவையை தலைக்கறி வரமிளகாய், தேங்காய் மற்றம் சிறு வெங்காயம் போட்டு வதக்கி கொடுத்திருந்தனர். முக்கியமாக நன்றாக வெந்து இருந்தது. இரண்டு இட்லிக்கு ஒரு ப்ளேட் தலைக்கறியை காலி செய்தேன். நான் மட்டும் தான் காலி செய்தேன் என்று திரும்பி பார்த்தால் என் சகாக்கள் எல்லோம் காலி செய்தனர்.

மீண்டும் அண்ணே குடல் ஆகிவிட்டதா என்றேன், இரண்டு நிமிடம் பொறுங்க தம்பி, இப்பதான் இறக்கி வைத்துள்ளனர் என்றார். அதற்குள் என் சகா இன்னும் இரண்டு இட்லி ஒரு ப்ளேட் தலைக்கறி என சொல்ல, எனக்கு மீண்டும் நாவில் எச்சில் ஊற ஆரம்பித்தது, எனக்கும் அதே போல என சேர்த்து சொன்னேன். மறுபடியும் இரண்டு இட்லிக்கு அந்த ப்ளேட் தலைக்கறியும் சாப்பிட்டாச்சு, சாப்பிட்டு நிமிரும்போது குடல் ரெடி எத்தனை ப்ளேட் என்றனர், இப்ப ஆளுக்கு ஒன்னு என்று ஆர்டர் சொல்லி காத்திருக்கவில்லை சுடச்சுட உடனே வந்தது, ஒரு ப்ளேட் நிறைய குடல் கறி எங்கள் இலையை பதம் பார்த்தது.

குடல் கறியில் நன்றாக வெந்த பின் அதில் மசாலாவை தூக்கலாக சேர்த்து இருந்தனர் மசலாவும், குடலும் நன்கு பிணைந்திருந்தது. அதன்பின் பெரியவெங்காயம், பச்சைமிளகாய், கறிவேப்பில்லை உடன் பெப்பர் கொஞ்சம் கலந்து குடலோடு சேர்த்து கிரேவியாக கொடுத்தனர். இதற்கும் இட்லிக்கும் உண்டான காம்பினேஷனில் மீண்டும் இரண்டு இட்லி உள்ளே போனது. ஆசானூருக்கு சென்று சாப்பிட இடம் இல்லாமல் இங்கேயே வயிறு நிரம்பியது.

நிச்சயம் சத்தியமங்கலம் பக்கம் சென்றால் சாப்பிட்டு பாருங்க தலைக்கறி, மற்றும் குடல் கறியையும் எப்போதும் மறக்காத சுவை. மீண்டும் சாப்பிட தோன்றும் சுவை. சத்தியமங்கலம் என்றலே வீரப்பன் ஞாபகம் வரும் தற்போது எனக்கு தலைக்கறியும், குடல்கறியும் தான் ஞாபகம் வருகிறது.

ஒரு நபர் எட்டு இட்லி 2 ப்ளேட் தலைக்கறி, 2 ப்ளேட் குடல் கறி சாப்பிட்டால் நிச்சயம் நகர்புறத்தில் 300 ரூபாய்க்கு மேல் தான் பில் வரும். ஆனால் இங்கு மிக குறைவான விலையில் அசத்தலான டேஸ்ட்டில் இருந்தது.

பெயர்:  ஹோட்டல் அன்னலட்சுமி ( சைவம், அசைவம்)

இடம்: சத்தியமங்கலம் ( பஸ்நிலையத்தில் இருந்து ஈரோடு செல்லும் வழியில் இடப்பக்கம் உள்ளது

விலை: ஒரு ப்ளேட் தலைக்கறி 40 ரூபாய், குடல்கறி 40 ரூபாய் என மிக குறைந்த விலைதான். 

சோத்துக்கடை - அவிநாசி திருமூர்த்தி டீ ஸ்டால்

சோத்துக்கடை நிறைய எழுதுவதில் எனக்கு உடன்பாடு இல்லை அவ்வப்போது இதுவரை யாரும் அறியாத அதாவது அந்த ஊர்க்கராருக்கே அதன் சுவை தெரியாமல் இருப்பது போன்ற கடைகளை எழுதினால், என்னைப்போல தேடி தேடி சாப்பிடுபவர்களுக்கு மிக பயனாக இருக்கும் அவ்வாறு இருக்கும் கடைகளை மட்டும் பதிவாக்கவேண்டும் என்பது என் எண்ணம்.

இன்று நாம் சாப்பிடும் சோத்துக்கடை அவிநாசி திருமூர்த்தி டீ ஸ்டால் & மெஸ் இதன் பெருமை அந்த ஊர்க்கரார்களுக்கே சிலருக்கு தெரியவில்லை என்பது தான் முக்கிய அம்சம். டீ ஸ்டால் என்று தான் அனைவரும் நினைப்பர் ஆனால் உள்ளே என்நேரமும் 20 பேர் உட்கார்ந்து அவர்களின் கையும், வாயும் சண்டை இட்டுக்கொண்டு இருக்கும் என்பதை அறிந்து இருக்கமாட்டார்கள்.

2000ம் வருடம் எனக்கு அறிமுகம் இந்த திருமூர்த்தி டீ ஸ்டால், நண்பர் ஒருவருடன் கோவைக்கு காலையில் நேரத்திலேயே பயணித்துக்கொண்டு இருந்தோம் அவிநாசி வரும் போது காலை உணவை இங்கேயே முடித்துக்கொள்ளலாம் என்றார் சரி என்று இட்லியும், ஆப்பமும் சாப்பிட்டேன் ஏனோ அந்த கடையில் சுவை பிடித்து விட காரில் செல்லும் போது எல்லாம் சாப்பிடும் கடையாகிவிட்டது.

சமீபத்தில் குடும்பத்துடன் சென்றேன், குடும்ப மக்கள் எல்லாம் இந்த கடை அந்த கடை என்று லைட் வெளிச்சம் அதிமாகவும், பளீர் என்று தெரியும் படி உள்ள கடையை கை காண்பித்தனர். கம்முன்னு வாங்க ஒரு நல்ல டீக்கடையை காண்பிக்கிறேன் என்றதும் டீக்கடையா? என்று ஆளாளுக்கு மூஞ்சியை இழுத்தனர்.

அவிநாசி பஸ் நிலையத்தில் இருந்து கோவை செல்லும் வழியில் இடப்பக்கம் டெலிபோன் ஆபிசை தாண்டி அரச மரத்துக்கு பககத்தில் காலை 8 மணிக்கு வண்டியை நிறுத்த இடமில்லாமல் தள்ளி நிறுத்தி இது தான் அந்த கடை என்றேன். இதுவா, என்று ஆளாளுக்கு வாயை பிதுக்கினர். வெளியில் பெஞ்ச் போடப்பட்டு அடுத்து உள்ளே போவதற்கு தயாராக உட்கார்ந்திருந்தனர் சில குடும்பங்கள் அடுத்து நாங்கள் போய் நின்றதும் எங்க குடும்ப மக்கள் எல்லாத்துக்கும் என் மேல அம்மூட்டு கோபம்.

அப்போது ஒரு குடும்பம் சாப்பிட்டுவிட்டு வெளியே வந்து அவர்களின் BMW காரில் ஏறி அமர்ந்தனர். அப்போது தான் வீட்டு மக்களிடம் சொன்னேன் பாருங்க இந்த கடை வாடிக்கையார்களை என்று. அடுத்து எங்களுக்கு இடம் கிடைக்க ஆள் ஆளுக்கு கிடைத்த இடத்தில் உட்கார்ந்தோம் இலை வைத்து தண்ணீர் வைத்த உடன் இட்லி ஆர்டர் செய்தோம். (நிற்க கவனிக்க இட்லிக்கா எங்களை இவ்வளவு தூரம் படிக்க வைத்தாய் என்று தோணிருக்குமே ) இட்லி என்றால் குஷ்பு இட்லியான்னு தான் நம்மாளுக கேப்பாங்க ஆனா அது இல்லீங்க நன்றாக சுடச் சுட நல்ல வெளீர் நிறத்தில் பஞ்சு போல இட்லியை வைத்தனர் கூடவே சட்னியும், சாம்பார் மற்றும் காரச்சட்டினி அட அட இட்லியை எடுத்து சட்னியில் தொட்டு, சாம்பாரில் தொட்டு சாப்பிட்டால் லபுக்கு என்று உள்ளே போகும், போகும் போது அடுத்த துண்டு எப்ப நாக்கிற்கு வரும் என்று நாக்கு நிச்சயம் எதிர்பார்க்கும் அளவிற்கு இருக்கும். நான் எப்பவும் இட்லி சட்னி, சாம்பார் மூன்றையும் நன்கு பிசைந்து சாம்பாரை நிறைய ஊற்றி குடுக்கும் ஆள் அதனால் நான் எப்பவும் 7 இட்லிக்கும் குறையாமல் சாப்பிடுவேன்.

அடுத்து தோசை, ஆப்பம் என சிம்பிளான உணவு வகைகள் தான் அவ்வப்போது பொங்கல் இருக்கும் இவை அனைத்துக்கும் அவர்கள் கொடுக்கும் சட்னி சாம்பாரின் ருசியில் நிச்சயம் மனம் குளிர்ந்து தான் போகவேண்டும். அன்று சாப்பிட்டுவிட்டு என் குடும்பத்தினர் இனி ஊருக்கு வரும் போது எல்லாம் வண்டி அவிநாசி போய்ட்டுத்தான் வரனும் என்று அன்பு கட்டளை பிறப்பிக்கப்பட்டது.

காலை தான் இப்படி என்றால் இரவு இடம் கிடைப்பதற்குள் போதும் போதும் என்றாகிவிடும் கிட்டத்தட்ட அரை மணி நேரம் கழிச்சுத்தான் இடமே கிடைக்கும் அந்த அளவிற்கு கூட்டம் நிற்கும். இரவு மெனுவும் ஒன்றும் பெரியதாக இல்லை இட்லி, தோசை, பொடி தோசை, ஆப்பம், சப்பாத்தி என்று சிம்பிளாகத்தான் இருக்கும் ஆனால் சுவைதான் மீண்டும் அங்கு வரத்தோணும். சின்ன இடம் என்றாலும் சுவையானது என்றால் தேடிப்போவதில் ஒன்றும் தவறில்லை..

பெயர்:  திருமூர்த்தி டீ ஸ்டால்

இடம்: அவிநாசி (புது பேருந்து நிலையத்தில் இருந்து கோவை செல்லும் வழியில் இடப்பக்கம் நடக்கும் தூரத்தில் உள்ளது)

விலை: மிக மிக குறைவுதான்

படம் நெட்டில் சுட்டது...

நாட்டுக்கோழி பள்ளிபாளையம் செய்வது எப்படி?

 இன்று அனைவரும் படித்து விட்டு வெளியூருக்கு குடும்பத்தை விட்டு வேலைக்கு செல்கின்றனர். இதில் நிறைய பேர் மேன்ஷனில் தங்குகின்றனர் இன்னும் சில பேர் நண்பர்களின் அறையில் தங்குகின்றனர். இவர்கள் எல்லாம் பக்கத்தில் இருக்கும் பாட்டி கடை அல்லது கையேந்தி பவன் என அவர் அவர் வசதிக்கு ஏற்ப சாப்பிடுவார்கள். சிலர் நான்கு பேர் ஒரு வீடு எடுத்து சமையல் பாத்திரங்கள் எல்லாம் வாங்கி அவர்களே சமைத்து சாப்பிடுவார்கள். இதில் நான் கடைசி ரகம்.

நான் கொஞ்ச நாள் ஈரோட்டில் வேலை செய்து விட்டு சென்னைக்கு 2002 ம் ஆண்டு சென்னைக்கு வேலைக்குச் சென்றேன். அங்கு நாங்கள் 5 பேர் சேர்ந்து திருவல்லிக்கேணி ஆதாம் மார்க்கெட் அருகே உள்ள முத்துருன்னிசா பேகம் வீதியில் உள்ள அப்துல் காதர் வீட்டில் வீடு எடுத்து தங்கி இருந்தோம் எனது அலுவலகம் வாலாஜா ரோட்டில் இருந்தது. முதன் முதலாக இங்கு தான் நான் சமைக்கப்பழகினேன். முதலில் தக்காளி பச்சி கூட செய்யத் தெரியாமல் குக்கரில் எத்தனை டம்ளர் அரிசிக்கு எவ்வளவு தண்ணீர் என தெரியாமல் இருந்த நான் கொஞ்ச நாளில் நாங்கள் 5 பேரும் சமையலை ஒரு அளவிற்கு கற்றுக்கொண்டோம். அன்று முதல் இன்று வரை சமையல் செய்வது எனக்கு மிகவும் பிடித்த ஒன்று.

நான் இம்முறை எங்கள் ஊரிற்கு சென்ற போது நாங்கள் ஒரு 10 பேர் சேர்ந்து நாட்டுக்கோழி 4 கிலோ எடுத்து காவிரி ஆற்றங்கரையில் சமைத்து சாப்பிட்டோம். அன்று எனது சமையல் ரொம்ப நாளைக்கு அப்புறம் அரங்கேறியது. நம் பதிவர்களில் நிறைய பேர் திருமணம் ஆனவர்கள், ஆகாதவர்கள் என அனைவரும் இருப்பார்கள் உங்களில் பலபேருக்கு சமையல் தெரிந்து இருக்கும் தெரியாமலும் இருக்கும் நீங்கள் சிக்கன் செய்ய விரும்பினால் உங்களுக்கு எல்லாம் உதவும் என்ற வகையில் எனக்கு தெரிந்த எங்கள் ஈரோடு மாவட்டத்தில் மிகவும் பிரபலமான பள்ளிபாளையம் சிக்கன் எப்படி செய்வது என்று சொல்கிறேன். நீங்களும் செய்து சாப்பிட்டு பாருங்கள் பள்ளிபாளையம் சிக்கனை.


பள்ளிபாளையம் சிக்கன்


தேவையான பொருட்கள்

நாட்டுக்கோழி  - 1 கிலோ

சின்னவெங்காயம் - கால் கிலோ

வரமிளகாய் - 20 ( மிளகாய் உள் இருக்கும் விதைகளை எடுத்து விடவேண்டும்)

தேங்காய் - 1 (சிறு துண்டுகளாக வெட்டிக்கொள்ள வேண்டும்)

சிக்கன் மசாலா - 50 கிராம்

நல்லெண்ணய் எண்ணெய் - 6 ஸ்பூன்

கறிவேப்பில்லை - 6 இலை

கொத்தமல்லி - 6 இலை

மஞ்சள் தூள், உப்பு தேவையான அளவு

செய்முறை

சிக்கனை சுத்தமாக தண்ணீரில் அலாசி தண்ணீரை வடிகட்டிக்கொள்ள வேண்டும். அடுப்பில் சட்டியை வைத்து எண்ணெய் ஊற்ற கடுகு பொறிய விடவேண்டும். பின் வரமிளகாய், கறிவேப்பிலை போட்டு ஒரு நிமிடம் வதக்க வேண்டும். வெங்காயத்தை போட்டு நன்கு வதக்க வேண்டும். சிக்கன் துண்டுகளை போட்டு நன்கு வதக்க வேண்டும் வதக்கும் போது மஞ்சள் தூள் கொஞ்சம் சிக்கன் மசாலா துளை போட்டு கொஞசம் தண்ணீர் தெளித்து வேக விடவேண்டும் சிக்கன் வேகும் போது கிளறி விட்டுக்கொண்டே இருக்க வேண்டும். உப்பு தேவையான அளவு போட்டு விட்டு 20 நிமிடம் கழித்து நறுக்கிய தேங்காயை போட்டு நன்கு கிளற வேண்டும். மீண்டும் கொஞ்சம் தண்ணீர் தெளித்து சிக்கனை வேக விடவேண்டும். சிக்கன் வெந்துவிட்டதா என ஒரு துண்டு எடுத்து சாப்பிட்டு பாருங்கள் வெந்த உடன் கொத்தமல்லி இலை தூவி இறக்கி வைத்து சாப்பிட ஆரம்பிக்கவும். இப்ப சுவையான பள்ளிபாளையம் சிக்கன் தயார். இந்த பள்ளிபாளையம் சிக்கன் ஈரோடு மாவட்டத்தில் மிகவும் பிரபலம்.

நாட்டுக்கோழி சமைக்கையில் முக்கியமாக கவனிக்கவேண்டியது நல்லெண்ணை இதைக்கொண்டு சமைக்கும் போது நாட்டுக்கோழியின் சுவை அதிகமாகும்.

நண்பர்களே நீங்களும் செய்து சாப்பிட்டு இந்த சுவையை அனுபவியுங்கள்.

டயட்டில் இருக்கீங்களா?? அப்ப இந்த பக்கம் வாங்க...

 பதிவுகள், முகநூல் மற்றும் இரண்டு நண்பர்கள் சேர்ந்தால் பேச்சோடு பேச்சாக பேசுவது உடலைப்பற்றித்தான். உடல் நலம் எப்படி இருக்கு என்னடா மச்சி தொப்பை விட்டுவிட்டது போல.. மாமானார் வீட்டு சாப்பாடு ரொம்ப அதிகமோ என்ற பேச்சுக்கள் பேசுவது இயல்பு.

இன்று 30 வயதை தாண்டியவுடன் கூடவே பிபி மற்றும் சர்க்கரை லேசாக நம் உடலை எட்டிப்பார்க்கிறது இதற்கு மிக முக்கிய காரணம் நம் உணவு வகை மாற்றம் தான் மற்றும் சரியான உடற்பயிற்சி இன்மை வேலைப்பளுவால் உண்டான மனஅழுத்தம் போன்றவை தான் இதற்கெல்லாம் மிக முக்கிய காரணம்.

அடுத்த காரணம் உணவு இன்று வாரத்தில் 2 நாளாவது ஓட்டலில் சாப்பிடுவது வழக்கமாகிவிட்டது அனைவருக்கும் மூக்கு முட்ட தின்று விட்டு பின் கோக், சோடா என குடித்து அஜீரணக்கோளாறில் இருந்து தப்புகிறோம்.. இதை எல்லாம் குறைக்கனுமா அப்ப டயட் இருங்க என்று விளம்பரம் மற்றும் நண்பர்களின் வழிகாட்டலால் டயட் தான் சரியான வழி என்று அதை பின்பற்றுகின்றனர் இன்றைய மக்கள்..
 

 பெண்களை குறிப்பாக சொல்லவேண்டும் என்றால் ஒல்லியாக வேண்டும் என்று சாப்பாடு சாப்பிடுவதையேக் குறைத்து சப்பாத்தி மட்டும் தின்பவர்கள் நிறைய இருக்கின்றனர். டயட் என்ற பெயரில் நேர நேரத்திற்கு சாப்பிடாமல் உடலை கெடுப்பவர்கள் தான் அதிகம்...

நண்பன் ஒருவன் தினக்கு பிபி இருக்கிறது என்றான் எனக்கும் இருக்குடா என்றேன் நான் டயட் இருந்து கொழுப்பை குறைக்கிறேன் என்ற பேர்வழியாக கடந்த 8 மாதங்களாக டயட்டில் இருக்கிறான்.. சமீபத்தில் அவனுக்கு போன் செய்து விட்டு வீட்டுக்கு சென்றேன் ஆள் ஓமக்குச்சி நரசிம்மன் போலாகி இருந்தான் அடட ஆச்சர்யம் என்றேன்.. உடனே அவன் மனைவி ஏன்னாகேக்கறுங்க இவ்ர் கதையை டயட் டயட் என்ற பெயரில் ஒன்னும் திங்காம உடம்பில் உள்ள சத்துக்கள் எல்லாம் போய் பைக்க ஸ்டார்ட் செய்வதற்கே மிக தடுமாறுகிறார். அரிசி மூட்டைய தூக்க முடியல 1 மணி நேரம் கார் ஓட்டுவதற்குகே பாடாப்படுத்துகிறார் என்றால் ஏன்டா இப்படி என்று அவனை பேசிவிட்டு நல்லா சாப்பிடுடா என்றேன்..

 

அப்புறம் உன் டயட் என்னடான்னு கேட்டேன்.. ( பதிவ தேத்துனமுள்ள) காலை எழுந்தவுடன் ஒரு டம்ளர் க்ரீன் டீ அப்புறம் ஓட்ஸ் 1 கப், மதியம் 1 கப் சாதம், கொஞ்சம் கீரை, கொஞ்சம் ரசமாம், மீண்டும் இரவு 7 மணிக்கு 3 சப்பாத்தி அவ்வளவுதான் அவன் உணவாம் இடையில் எந்த பழங்களோ, திண்பண்டங்களோ சாப்பிடுவதில்லை இப்படி 8 மாதம் தின்னா அந்த உடம்பின் என்ன இருக்கும் இப்ப எழும்பு தான் இருக்கு... நல்லா சாப்பிடு மகனே என்று சொல்லி விட்டு அங்கிருந்து கிளம்பினேன்...

டாக்டர் நண்பருக்கு அழைத்து இவன் பிரச்சனையை சொன்னதும் அவர் சிரி சிரி என்று சிரிக்கிறார். எப்பவும் என்பது எண்ணெய் பண்டங்களையும், கொழுப்பு உள்ள பொருட்களை உண்ணுவதையும் குறைச்சிக்கனும் இது எல்லோரும் செய்யலாம்  உங்க நண்பர் போல சாப்பிடாமல் இருப்பது மிக தவறான ஒன்று இந்த டயட் எல்லாம் இப்ப 10 வருடத்துக்குள் தான் வந்தது நாம் சாப்பிடும் உணவிற்கு சரியான உடல் உழைப்பு இல்லாதவர்கள் அவர்கள் உழைப்பிற்கு ஏற்ற உணவுகளை உட்கொள்ளவேண்டும் அதுவும் சத்தான உணவுகளை உண்ணலாம் என்றார்.

முழு டயட்டில் ஈடுபடுபவர்கள் மருத்துவரின் ஆலோசனை பேரிலே டயட்டில் இருப்பது நன்று. இணையத்தில் படிப்பது, பத்திரிக்கை செய்தியை படித்து டயட் இருப்பதெல்லாம் தவறு. 40 வயதுக்கு மேல் உள்ளவர்கள் நிச்சயம் தங்கள் உடலை முழுபரிசோதனைக்கு உட்பட்டு பின் அவர்கள் என்ன சாப்பிடலாம் என்பதை மருத்துவரின் சொற்படிதான் தான் டயட் எல்லாம் இருக்கனும்.

30 வயதை கடந்தவர்கள் எல்லாம் உணவுகளை உட்கொண்டு அதற்கான உடற்பயிற்சியான நடைபயிற்சி, தியாணம், யோகா போன்றவற்றை தினமும் 40 நிமிடம் செய்யலாம். குறைந்த வயதில் டயட் இருந்தால் 45 வயதிற்கு மேல் உடலில் வழு இல்லாமல் போய்விடும் உடல் நல்ல வலிமையாக இருந்தால் தான் 65 வயதிற்கு பின் வாழ முடியும். இன்றும் நம் தாத்தாக்கள், அப்பாக்கல் எல்லாம் அவர்களே பஸ், இரயில் எல்லாம் ஏறி இறங்குகின்றனர் ஆனால் குறைந்த வயதில் உள்ளவர்கள் டயட் இருந்து ஒன்னும் திங்காத உடலை கெடுத்துக்கொண்டல் நிச்சயம் நடப்பதற்கு கூட சிறமப்படவேண்டி இருக்கும்...

காலை எழுந்தஉடன் ஒரு 30 நிமிடம் யோகா பின் 10 நிமிடம் கழித்து 2 சொம்பு தண்ணீர் அல்லது அதற்கு மேல் குடித்து விட்டு ஒரு 20 நிமிடம் நடை பயணம் போதும் இளவயதுக்காரங்களுக்கு பின் காலை உணவை கட்டாயம் எடுத்து கொள்ள வேண்டும் இடையில் சாப்பிடும் எண்ணெய் பலகாரங்களை மிக குறைத்துக்கொள்ளவேண்டும் அதற்குன்னு சாப்பிடாமல் இருக்கவேண்டாம் வாரம் இரு முறை சாப்பிடலாம் பொறி, வேகவைத்த கடலை, மற்றும் பழங்கள் எவ்வளவு வேண்டுமானாலும் சாப்பிடலாம் முக்கியமா இரவு அரைவயிறு சாப்பிட்டு விட்டு கால் வயிறு தண்ணீரோடு முடிச்சிக்கனும் இரவு உணவு.. உண்ட பின் ஒரு 1 மணி நேரம் கழித்து தூங்குவது நலம்.

டயட்டு டயட்டு என்று குறைந்த வயதிலேயே தொப்பைய குறைக்கிறேன், இடுப்பை குறைக்கிறேன் என்று எதையும் சாப்பிடாம இருந்தீங்கன்ன அப்புறம் உடலில் சத்தே இல்லாமல் சீக்கிரம் போய்ச்சேரவேண்டியது தான்...

நிறைய சாப்பிடுங்கு தினமும் மறக்காம 1 மணி நேரம் உடற்பயிற்சிக்கு ஒதுக்குங்க... பக்கத்தில் இருக்கும் இடத்திற்கு செல்ல நடந்து செல்லுங்க, அலுவலகத்தில் லிப்ட் பயன்படுத்தாம படிக்கட்டுகளில் நடந்து செல்வதை வழக்கமாக வைச்சுக்குங்க உடம்பு சிக்குன்னு இருக்கும்....