அஞ்சறைப்பெட்டி 21.02.2013

உள்ளுரில் இருந்து உலகம் வரை........

 

 

கெஜட்டில் காவிரி தீர்ப்பு வெளியானது யாருக்கு சந்தோசமோ இல்லையோ டெல்டா விவசாயிகளுக்கு மிக கொண்டாட்டமான நிகழ்வு இது. இதற்கு நான் தான் காரணம் நீ தான் காரணம் என்று அரசியல் செய்யாமல் இருந்தால் சரி.. தமிழனுக்கு கிடைக்க வேண்டிய நீதி காவிரி பங்கீட்டில் கிடைத்து விட்டது என்றே சொல்லலாம்... நல்லது நடந்தால் நமக்கும் சந்தோசம் தானே...

  ................................................................

 

லட்சக்கணக்கான ஈழத் தமிழர்கள் கொடூரமாகக் கொல்லப்பட்டது குறித்த புகைப்படங்கள் உள்ளிட்டவை வெளியானபோதும் கூட  நாம் அதை பாவத்தோடு தான் பார்த்தோம். தற்போது சின்னஞ்சி சிறுவனான பாலச்சந்திரன் மிகக் கொடூரமாகக் கொல்லப்பட்டதாக புகைப்பட ஆதாரங்கள் வெளியாகி அனைவரையும் பதறடிக்க வைத்துள்ளது. என்னைக்கண்கலங்க செய்தது என்னைப்போல் நிச்சயம் பலர் கண் கலங்கி இருப்பனர். பாவமாக இருக்கிறது அந்த சிறுவனின் முகம். சட்டை கூட போடாமல் உட்கார வைத்து கையில் பிஸ்கட் கொடுத்து சாப்பிட வைத்து கொன்றுள்ளனர் படுபாவிகள் இதை விட கேவலமான செயல் எதுவுமில்லை இது போர்க்குற்றம் தான் ஆனால் என்ன ஒன்றும் நடக்கப்போவதில்லை.  உலகிலேயே மிகப் பெரிய அசிங்கம் பிடித்த கோழைகளாக மாறிப் போயுள்ள சிங்கள படையினர், அந்த சிறுவனின் நெஞ்சில் சுட்டு வெற்றியை காட்டி உள்ளனர். ஒரு தலைவனின் மகன் லுங்கியோடு உட்கார்ந்திருப்பதை பார்க்கும் போது சொல்லத்தோனுகிறது இவர் அல்லவா தலைவர் என்று...

மன்னித்துக்கொள்ளடா பாலச்சந்திரா...

நாங்கள் கையாலாகாத தமிழர்கள்........

..........................................................................................

சமீபத்தில் தூக்கு தண்டனை என்பது சாதாரண நிகழ்வாக இருக்கிறது தவறு செய்தவன் அதுவும் மிகக்கொடுரமான தவறு செய்தவர்களுக்கு இந்த தண்டனை அழித்தால் நிச்சயம் பாராட்டலாம் ஆனால் வீரப்பனை பார்க்காதவர்கள் எல்லாம் அனுபவிக்கப்போகிறார்கள் என்பது கொஞ்சம் வருந்ததத்தக்கதாக உள்ளது.. என்னைப்பொறுத்தவரை ஒருவனை அழிக்கும் உரிமை நமக்கு இல்லை ஒரு முறை தான் மீண்டும் அந்த உயிர் கிடைக்காது என்பதால் தூக்கு தண்டனையை எதிர்ப்பதில் தான் நிற்கிறது எனது மனது..

................................................................................................

அகில இந்திய அளவில் பந்த் என்றனர் இருந்தாலும் ஒரு 50 பைசாவாது குறைப்பார்கள் என்று நம்பி இருந்தேன் இந்த பந்தால் ஆனால் நடந்தது ஒரு பைசா கூட குறைக்கவுமில்லை பந்த் தமிழ்நாட்டில் வெற்றி பெறவுமில்லை. இவர்கள் பெட்ரோல் டீசல் விலையை உயர்த்திக்கொண்டு தான் இருப்பர் நாம் தான் அதை பக்குவமாக அல்லது கட்டாயமாக ஏற்றுக்கொள்ளவேண்டும்.

...............................................................................................

வைகோ முதல்வர் சந்திப்பு கூட்டணிக்கு அச்சாரமா என்று தான் பல செய்திகள் வருகின்றன அது உண்மையாகவும் இருக்கலாம் மக்கள் பிரச்சனைக்கு முன்னின்று போராட்டம் நடத்தும் வைகோ அரசியலில் சோபிக்காதது அவரின் அரசியல் சாணக்கியத்தனம் இல்லாதது என்பது தெரிகிறது.. தேர்தலில் நின்று வெற்றி பெறுவதை விட நிறைய போராட்டங்களால் மக்கள் ஆதரவை பெறலாம்.

...............................................................................................

 

பையன பள்ளியில் சேர்த்தனும் என்று பக்கத்தில் இருக்கும் பள்ளிகளில் விசாரித்ன் Pre K.G க்கு.. கோவைப்புதூரில் உள்ள அந்த பள்ளியில் சின்ன சின்ன விளையாட்டு சறுக்கல்கள் இருந்தன நானும் பையனும் சென்றோம் வாங்க என்று இனிமையான ஆங்கிலத்தில் வரவேற்றார்கள் ( ஆடு சிக்கிறுச்சுன்னு நினைச்சிறுப்பாங்க போல) அதை சொல்லித்தருகிறோம், இதை சொல்லித்தருகிறோம் எல்லாம் செய்முறை விளக்கத்தோடு தான் என்றனர். எவ்வளவு கட்டணம் என்றேன் அவர்கள் பதில் சொல்லவே இல்லை மறுபடியும் அவர்களின் பெருமையை பீத்தினார்கள் எல்லாம் இருக்கட்டும் கட்டணத்தை சொல்லுங்க என்றேன்.. வருடக்கட்டணம் 25000 மட்டுந்தான் அப்புறம் புத்தகம் துணி எல்லாம் எங்க கிட்டத்தான் வாங்கனும் அதற்கு 8000 ஓ பரவாயில்லையே அவ்வளதானா என்றேன் மீண்டும் கொஞ்சம் பேசிவிட்டு செய்முறை விளக்கங்களுக்கு ஒரு 6000 என்றனர். மொத்தம் 39 ஆயிரம் சரிங்க என்றேன் மறுபடியும் சில வரிகள் பேசிவிட்டு அட்டிமிஷன் பீஸ் 20000 ஆயிரம் ஒரு முறை செலுத்தினால் போதும் அப்புறம் கேக்கமாட்டோம் இது இல்லாம ஆண்டுவிழா, பாட்டுப்போட்டி என் நிறைய போட்டிகள் நடத்துவோம் ஒரு போட்டிக்கு 1000 செலவுவரும் என்றனர்...

ஆகா பணத்தை தவிர மற்றவற்றை பேச ஏனோ மறுக்கின்றனர் இங்கு மட்டுமல்ல எல்லா பள்ளிகளிலும் இது தான் நிலமை.. இவர்களே ஒரு சீட்டுத்தான் இருக்கு ரெண்டு சீட்டுதான் இருக்குன்னு பிட்ட போட்டு விட்டு நம்மை நாமம் போட பார்க்கின்றனர்...

அந்த பள்ளியில் இருந்து வெளியே வந்ததும் ஒரு டீக்கடையில் டீ குடிக்கும் போது எதாச்சையாக அங்கிருந்த பெரியவர் சொன்னார்... படிக்கிற குழந்தை எங்கிருந்தாலும் படிக்கும் என்று....

தகவல்

 

 

அமெரிக்கா சந்திரனுக்கு விஞ்ஞானிகளை அனுப்பி ஆய்வு மேற்கொண்டது. அதற்கு 'அப்பல்லோ மிஷன்' என பெயரிடப்பட்டது. அப்போது, அங்கிருந்து எடுத்து வரப்பட்ட பாறைகளின் மூலம் சந்திரனில் தண்ணீர் உள்ளதா என்ற ஆய்வு மேற்கொள்ளப்பட்டு வருகிறது.

இந்த ஆய்வில் ஈடுபட்ட மிசிகன் பல்கலைக்கழக நிபுணர்கள் தற்போது ஒரு அறிக்கை வெளியிட்டுள்ளனர். அதன்படி சந்திரனில் இருந்து எடுத்து வரப்பட்ட பாறை படிவங்களை ஆய்வு செய்வதில் சந்திரனில் தண்ணீர் இருந்ததற்கான அறிகுறி உள்ளது என உறுதி செய்துள்ளனர்.

சந்திரன் உருவானபோது அது ஈரத்தன்மையுடன் இருந்திருக்க வேண்டும். அது முழு வடிவாக மாறியபோது அதன் ஈரத்தன்மை குறைந்து கெட்டியாகி பாறையாக மாறி இருக்கலாம் என தெரிவிக்கப்பட்டுள்ளது. மிகவும் பளபளப்பான நிறத்தினால் ஆன இந்த பாறை சந்திரன் தோன்றியபோது உருவாகியிருக்கலாம்.

எடை குறைவு காரணமாக இவை அங்கிருந்த மேக்மா என்ற கடலில் மேற்பரப்பில் மிதந்து இருக்கலாம் என்றும் கூறப்பட்டுள்ளது. அந்த பாறைகளில் 'பிலிஜியோகல்ஸ் பெல்ட்ஸ்பா' என்ற தண்ணீர் துகள்கள் உள்ளன. எனவே சந்திரனில் தண்ணீர் இருந்ததற்கான ஆதாரங்கள் உள்ளன என்றும் விஞ்ஞானிகள் தெரிவித்துள்ளனர்.

தத்துவம்

நீ நடந்து போக பாதை இல்லையே
என்று கவலைப் படாதே,
நீ நடந்தால் அதுவே ஒரு பாதை.

மகிழ்ச்சியை எண்ணலாம்; விரும்பலாம்; அடையலாம். ஆனால் விலைக்கு வாங்க முடியாது!

நீ எப்பொழுதும் நல்லவற்றையே சிந்தி, உனக்கு எல்லாம் நல்லவைகளாகவே நடக்கும் இது விதி, தீயவற்றைச் சிந்தித்தால் தீயவையே நடக்கும் இதுவும் விதி.